म. टा. विशेष प्रतिनिधी, मुंबई

लोकसभा निवडणुकीत युतीची घोषणा करताना निम्या निम्म्या जागा वाटून घेण्याचे जाहीर करण्यात आले असले तरी प्रत्यक्षात शिवसेनेला निम्म्या जागा देण्यात आलेल्या नाहीत. शिवसेनेला १२४ जागा देताना भाजपने त्यांच्या कोट्यातील दोन विधान परिषदेच्या जागा दिल्या आहेत. साहजिकच मुंबईसह इतर काही ठिकाणच्या जागा न मिळाल्याने तेथील शिवसेनेच्या उमेदवारांनी पक्षाकडे नाराजी व्यक्त करायला सुरुवात केली आहे.

शिवसेनेसोबतची युती तोडणार नसून राज्यात पुन्हा महायुतीचीच सत्ता येणार असे सांगणाऱ्या भाजपने शिवसेनेला शेवटपर्यंत जागांसाठी झुंजवत ठेवल्याचे कळते. ऐनवेळी काही वाढीव जागा देत त्यांनी शिवसेनेला १२४ जागांवरच समाधान मानायला लावल्याचे कळते. सोमवारी रात्री उशिरा शिवसेना आणि भाजपने एकत्रित जागावाटपाची यादी प्रसिद्ध करीत पत्रकार परिषद घेऊन महायुतीची घोषणा करण्याचे टाळले. शिवसेनेने मुंबईतील गोरेगाव तसेच वडाळा या दोन जागा मिळाव्यात यासाठी प्रयत्न् केले होते. मात्र त्या न मिळाल्याने या दोन्ही ठिकाणी उमेदवारीच्या प्रतिक्षेत असणाऱ्यांनी मातोश्रीवर नाराजी व्यक्त केल्याचे कळते.

माजी महापौर श्रद्धा जाधव यांनी गेल्या काही वर्षांपासून वडाळा मतदारसंघात काम सुरू केले होते. मात्र, जागावाटपात हा मतदारसंघ शिवसेनेला न सुटल्याने त्यांनी सोमवारी रात्री उशिरा मातोश्रीवर येऊन नाराजी व्यक केल्याचे कळते. याशिवाय पुण्यातील आणि नाशिक शहरातील काही जागा शिवसेनेकडून मागण्यात आल्या होत्या, मात्र त्यापैकी कोणतीच जागा न मिळाल्याने तेथील उमेदवारांनीही मातोश्रीला नाराजी कळवल्याचे कळते. दरम्यान, काँग्रेसचे विधान परिषद सदस्य चंद्रकांत रघुवंशी यांनी आपल्या सदस्यत्वाचा मंगळवारी विधान परिषद सभापती रामराजे निंबाळकर यांच्याकडे सोपवला. या वेळी त्यांच्यासाबत शिवसेना नेते सुभाष देसाई तसेच शिवसेना सचिव मिलिंद नार्वेकर होते. त्यामुळे ते शिवसेनेत प्रवेश करतील, अशी शक्यता वर्तविण्यात येत आहे.

शिवसेनेच्या वाट्याला ज्या जागा आल्या आहेत, त्या पुढीलप्रमाणे

अक्कलकुवा, धुळे शहर, चोपडा, जळगाव-ग्रामीण, एरंडोल, पाचोरा, बुलढाणा, सिंदखेडराजा, मेहकर, बाळापूर, रिसोड, बडनेरा, तिवसा, अचलपूर, देवळी, ब्रह्मपुरी, वरोरा, दिग्रस, हदगाव, नांदेड- उत्तर, नांदेड-पश्चिम, लोहा, देगलूर, वसमत, कळमनुरी, परभणी, गंगाखेड,धनसावंगी, जालना, सिल्लोड, कन्नड, औरंगाबाद मध्य, औरंगाबाद पश्चिम, पैठण, वैजापूर, नांदगाव, मालेगाव बाह्य, कळवण, येवला, सिन्नर, निफाड, दिंडोरी, देवळाली, इगतपूरी, पालघर, बोईसर, नालासोपारा, वसई, भिवंडी ग्रामीण, शहापूर, भिवंडी पूर्व, कल्याण पश्चिम, अंबरनाथ, कल्याण ग्रामीण, ओवळा-माजिवडा, कोपरी-पाचपाखाडी, मुंब्रा-कळवा, मागाठाणे, विक्रोळी, भांडूप पश्चिम, जोगेश्वरी पूर्व, दिंडोशी, अंधेरी पूर्व, चांदिवली, मानखुर्द-शिवाजीनगर, अणुशक्ती नगर, चेंबूर , कुर्ला, कलिना,वांद्रे पुर्व, धारावी, माहीम, वरळी,शिवडी, भायखळा, मुंबादेवी, कर्जत, उरण, अलिबाग, श्रीवर्धन, महाड, जुन्नर, आंबेगाव, खेड-आळंदी, पुरंदर, भोर, पिंपरी, संगमनेर, श्रीरामपूर, पारनेर, नगर शहर, बीड, लातूर ग्रामिण, उमरगा, धाराशीव, परांडा, करमाळा, माढा, बार्शी, मोहोळ, सोलापूर शहर मध्य, सांगोला, कोरेगाव, कराड उत्तर, पाटण, दापोली, गुहागर, चिपळूण, रत्नागिरी, राजापूर, कुडाळ, सावंतवाडी, चंदगड, राधानगरी, कागल, करवीर, कोल्हापूर उत्तर, शाहूवाडी, हातकणंगले, शिरोळ, इस्लामपूर, पळूस-कडेगांव, खानापूर आणि तासगाव-कवठेमहांकाळ.

शिवसेनेच्या भूमिकेवर लढतीचे चित्र अवलंबून

म. टा. वृत्तसेवा, नवी मुंबई

भाजपच्या वतीने बेलापूर आणि ऐरोलीमधील उमेदवारांच्या नावाची घोषणा होताच नवी मुंबईतील गणेश नाईक समर्थकांमध्ये नाराजी पसरली आहे. ऐरोली मतदारसंघातून संदीप नाईक यांना उमेदवारी जाहीर झाल्यामुळे थोडासा दिलासा असला तरी गणे नाईक रिंगणात नसल्याने संताप व्यक्त होत आहे. तर बेलापूरमधूनच इच्छुक असलेले शिवसेनेचे विजय नाहटा यांनाही धक्का बसला आहे.

एकीकडे शिवसेना-भाजप युतीमध्ये नवी मुंबईतील किमान बेलापूर मतदारसंघ तरी आपल्या पक्षाला मिळेल या नवी मुंबईतील शिवसैनिकांच्या अपेक्षेवर देखील पाणी फेरले गेले आहे. ऐनवेळी बेलापूर मतदारसंघातून विद्यमान आमदार मंदा म्हात्रे यांना भाजपकडून युतीची उमेदवारी जाहीर झाल्यामुळे गणेश नाईक आणि त्यांच्या समर्थकांना मोठा धक्का बसला आहे. मंदा म्हात्रे यांच्या उमेदवारीमुळे बेलापूरमध्ये गणेश नाईक आणि शिवसेना उपनेते विजय नाहटा यांचे विधानसभा निवडणूक लढविण्याचे मनसुबे उधळले गेले आहेत. नवी मुंबई महापालिका हद्दीत येणाऱ्या बेलापूर आणि ऐरोली विधानसभा मतदारसंघातील युतीचे उमेदवार जाहीर झाल्याने विद्यमान आमदार मंदा म्हात्रे, राष्ट्रवादी काँग्रेसमधून नुकतेच भाजपमध्ये डेरेदाखल झालेले माजी मंत्री गणेश नाईक आणि शिवसेनेचे उपनेते विजय नाहटा यांच्यात होणाऱ्या संभाव्य लढतीची चुरस अखेर संपली आहे. यापूर्वी बेलापूर मतदारसंघातून नाईक, म्हात्रे आणि नाहटा या तिघांमध्ये गेल्या निवडणुकीत विजयासाठी चुरस होती. त्यात म्हात्रे यांनी बाजी मारली होती. आगामी विधानसभा निवडणुकीसाठी बेलापूरमधून पुन्हा उमेदवारी मिळवून म्हात्रे यांनी नाईक व नाहटा यांना निवडणुकीपूर्वीच रणांगण सोडण्यास भाग पाडले.

आगामी विधानसभा निवडणूक शिवसेना आणि भाजप एकत्रितपणे युतीच्या माध्यमातून लढत आहेत. त्यामुळे बेलापूर आणि ऐरोली या दोन्ही विधानसभा मतदारसंघांचा विचार करता या दोन्ही मतदारसंघांमध्ये युतीचे पारडे जड आहे. आता फक्त युतीचा धर्म पाळून शिवसैनिक भाजप उमेदवारांचा प्रचार कसा करतात, त्यावर पुढचे गणित अवलंबून आहे.

अन्य पर्याय?

भाजपाची एकच यादी प्रसिद्ध झाली आहे. दुसरी यादी जाहीर झालेली नाही. त्यामुळे दुसऱ्या यादीमध्ये गणेश नाईक यांना एखादा मतदारसंघ मिळू शकेल, या आशेवर समर्थक आहेत. राज्यात १५ वर्षे मंत्रिपद आणि नवी मुंबई महापालिकेची सत्ता एक हाती असतानाही नवी मुंबईचा विकास झाला नाही असे कारण देत नवी मुंबईतील नागरिक व प्रकल्पग्रस्तांचे प्रश्न सोडविण्यासाठी राष्ट्रवादी काँग्रेसला सोडचिठ्ठी देऊन नाईक यांनी आपला आमदार पुत्र संदीप नाईक व राष्ट्रवादीच्या ४८ नगरसेवकांसह विधानसभा निवडणुकीच्या तोंडावर भाजपत प्रवेश केला होता. असे असताना नाईक यांना विधानसभेची उमेदवारी न देऊन भाजपने घराणेशाहीला पक्षात थारा नसल्याचा संदेश दिल्याची चर्चा नवी मुंबईत सुरू आहे.

खड्डेमुक्ती कधी?

ठाणे जिल्ह्यातील रस्त्यांची दुरवस्था झाली आहे. नवरात्रीपूर्वी जिल्ह्यातील खड्डे बुजवण्याचे निर्देश सर्व यंत्रणांना लोकप्रतिनिधींकडून देण्यात आले होते. परंतु दहा दिवसांमध्ये यामध्ये फारशी सुधारणा झालेली नाही. ठाणे शहरासह जिल्ह्यातील सर्व महामार्गांवर मोठे खड्डे कायम आहेत. विशेष म्हणजे खड्डे बुजवण्यासाठी वापरलेल्या निकृष्ट दर्जाच्या साहित्यामुळे खड्ड्यातील खडी रस्त्यावर पसरली असून त्यामुळे अपघातांची भीती आहे. यामध्ये दुचाकीस्वारांना मोठा फटका बसत आहे. शिवाय उडणाऱ्या धुळीमुळे वाहनचालकांच्या आरोग्यालाही धोका निर्माण झाला आहे. याच पार्श्वभूमीवर ठाणे महापालिकेच्या आयुक्तांनी रस्त्यावरील खड्डे पाहणीचा निर्णय घेतला. परंतु केवळ खड्डे बुजवण्याची पाहणी न करता ते पुन्हा उद्भवणार नाहीत यासाठी कायमस्वरूपी उपाय करण्याचीही गरज आहे. प्रशासनाकडून वारंवार प्रयत्न होत असले तरी खड्ड्यांपासून रस्त्यांची मुक्तता होत नाही. प्रशासनाकडून यासाठी व्यापक प्रयत्न करून ठाणेकरांना किमान या खड्ड्यांच्या संकटातून सोडवावे. इतर प्राधिकरणांनीही खड्डेमुक्तीसाठी प्रयत्न करून चांगल्या रस्त्यांच्या सुविधा उपलब्ध करून द्याव्यात. अन्यथा खड्ड्यामुळे निर्माण होणाऱ्या सामाजिक प्रश्नांमुळे नागरिकांमध्ये संताप पसरू शकतो, याची दखल संबंधितांनी वेळीच घेतलेली बरी.

म. टा. वृत्तसेवा, पालघर महात्मा गांधीजींच्या १५० व्या जयंतीनिमित्त संपूर्ण पालघर जिल्ह्यात आज, बुधवारी ग्रामपंचायतीमध्ये महाश्रमदान करण्यात येणार आहे. तसेच पंचायत समिती स्तरावर विविध उपक्रमांचे आयोजनही करण्यात आले आहे. जिल्हा परिषदेचे मुख्य कार्यकारी अधिकारी महेंद्र वारभुवन यांनी दिलेल्या आदेशानुसार 'स्वच्छता ही सेवा' या अभियानांतर्गत जिल्हा परिषदेच्या पाणी व स्वच्छता विभागातर्फे पंचायत समिती स्तरावर व ग्रामपंचायत स्तरावर हा उपक्रम राबवण्यात येणार आहे. पंचायत समिती स्तरावर कार्यक्षेत्रातील स्वच्छता रॅली, प्लास्टिकमुक्तीसाठी मॅरेथॉन स्पर्धांचे आयोजन , ग्रामपंचायत कार्यालयांमध्ये सॅनिटरी नॅपकिन इनसिनेटर मशीन बसविणे व ग्रामपंचायत कार्यक्षेत्रातील सफाई कर्मचाऱ्यांसाठी आरोग्य शिबिराचे आयोजन, असे विविध उपक्रम राबविण्यात येणार आहेत. गाव पातळीवरील संपूर्ण प्लास्टिक कचरा गोळा करेपर्यंत हा उपक्रम राबवण्यात येणार आहे. या उपक्रमाची प्रमुख संकल्पना प्लास्टिक कचरा संकलन व व्यवस्थापन ही आहे. यामध्ये प्लास्टिक गोळा करणे व त्यानंतरची विल्हेवाट लावणे याचे नियोजन करणे, प्रत्येक ग्रामपंचायतीला कृतीनिहाय माहिती ती शासनाच्या संकेतस्थळावर भरणे, श्रमदानाचे नियोजन करणे, गोळा केलेले प्लास्टिक कोठे साठवणार ते निश्चित करणे, प्लास्टिकऐवजी पर्यायी वापर करण्यासाठी कापडी पिशवीचा वापर, प्लास्टिक बाटलीऐवजी काचेचा किंवा तांब्याचा ग्लास इत्यादी व्यवस्था निर्माण करणे, थर्माकोल पत्रावळीऐवजी केळीच्या पानांचा वापर करणे, शाळेच्या विद्यार्थ्यांची या विषयांवर वक्तृत्व स्पर्धा, निबंध स्पर्धा आयोजित करणे, कलापथक कार्यक्रम करणे इत्यादी कार्यक्रमाचे आयोजन या उपक्रमांतर्गत करण्यात येणार आहे. या उपक्रमादरम्यान जमा होणारे प्लास्टिक महाराष्ट्र प्रदूषण नियंत्रण मंडळ, सिमेंट कारखाने व एनएचएआय येथे घेऊन जाण्याचे नियोजन केले जाणार आहे.

पुणे : ठसकेबाज लावणी, बैठकीची लावणी, खानदानी लावणी, गण, गवळण असे मराठी साहित्यातील लोकसंगीताचे विविध प्रकार गायनातून अनुभवण्याची संधी पुणेकर रसिकांना नुकतीच मिळाली. गायक कलाकारांनी लावणीचे विविध प्रकार सादर करून मराठी चित्रपटसृष्टीतील लावण्यांची मेजवानी रसिकांना दिली. निमित्त होते, भारतीय विद्या भवन व इन्फोसिस फाउंडेशनतर्फे आयोजित करण्यात आलेल्या 'सुंदरा मनामध्ये भरली' या कार्यक्रमाचे. या कार्यक्रमात राहुल जोशी, अभिजित वाडेकर, श्रुती देवस्थळी या गायकांनी विविध लावण्या सादर केल्या. त्यांना अमित कुंटे, राजेंद्र साळुंखे, डॉ. राजेंद्र दूरकर, प्रसन्न बाम या वादकांनी सुरेल साथसंगत केली. सुरुवातीला गण, गवळण झाली. त्यानंतर बैठकीची लावणी. चौकी लावणीलाही रसिकांनी दाद दिली.

म. टा. प्रतिनिधी, पुणे गेल्या अनेक महिन्यांपासून सुरू असलेल्या आयडिया व वोडाफोन या दोन कंपन्यांच्या विलीनीकरणाची प्रक्रिया सुरू असून नेटवर्क अपग्रेडेशन अंतिम टप्प्यात आल्याचा दावा आयडिया-वोडाफोनने केला आहे. मात्र, या प्रक्रियेमुळे पुढील काही दिवस आयडिया आणि वोडाफोनच्या कनेक्शनमध्ये काही ठिकाणी अडथळे येण्याची शक्यताही कंपनीकडून वर्तवण्यात आली आहे. 'आयडिया'कडून ग्राहकांना तसे एसएमएस पाठवण्यात आले असून नेटवर्कमध्ये अडथळे आल्यास काही काळ तग धरण्याची विनंतीही करण्यात आली आहे. गेल्या वर्षी या दोन कंपन्यांच्या विलीनीकरणाची घोषणा करण्यात आली. दोन्ही कंपन्यांनी नेटवर्कमध्ये मोठे बदल करून अधिक चांगल्या प्रकारचे नेटवर्क आणि स्पीड देऊ करण्याचा वायदा केला होता. त्याची प्रक्रिया अनेक महिन्यांपासून सुरू असून दोन्ही कंपन्यांच्या ग्राहकांना अनेक समस्यांना सामोरे जावे लागले आहे. या दोन्ही कंपन्यांनी मिळून पुणे आणि पिंपरी चिंचवड शहरामध्ये त्यांच्या पायाभूत सुविधांमध्ये ५० टक्क्यांहून अधिक वाढ केली असल्याचा दावा केला आहे.

म. टा. विशेष प्रतिनिधी, मुंबई 'धर्म आणि राजकारण यांची सरमिसळ करणे धोकादायक आहे. धर्माचा वापर करून धर्माची हानी होत आहे. धर्माचा राजकारणासाठी वापर सुरू झाला की हानी होते. धर्मग्रंथाची शास्त्रीय चिकित्सा झाली पाहिजे', असे परखड मत फादर फ्रान्सिस दिब्रिटो यांनी व्यक्त केले. ते मुंबई मराठी पत्रकार संघात आयोजित पत्रकारांशी वार्तालाप कार्यक्रमात बोलत होते. दिब्रिटो यांची जानेवारीमध्ये होणाऱ्या साहित्य संमेलनाध्यक्षपदी निवड झाल्यानंतर यासंदर्भात टीका आणि धमक्याही सुरू आहेत. या पार्श्वभूमीवर मुंबईमध्ये पहिल्यांदाच त्यांनी पत्रकारांशी मनमोकळा संवाद साधला. हुकूमशहांना पहिली भीती लेखणीची असते. कारण त्यांना लेखणीची ताकद माहिती असते. मी राजकारणी नाही, मात्र मला राजकीय मते आहेत. ही मते मी नैतिक भूमिकेतून मांडणार. त्याची कदाचित किंमतही चुकवायला लागेल, असे दिब्रिटो म्हणाले. इतिहासाचे पुनर्लेखन करताना ते राजकीय संघटनेने करू नये. ते सच्च्या इतिहासकाराने करावे, असे सांगताना त्यांनी भयमुक्त समाज हे आपले उद्दिष्ट असावे अशी अपेक्षा व्यक्त केली. सर्व प्रकारची बंदी ही भीतीतून येते. जो भयग्रस्त असतो तो असुरक्षित असतो. सध्याचे दिवस प्रचारकी थाटाचे आणि सत्य झाकण्याचे आहे. खऱ्याची भीती का वाटावी, असा प्रश्न विचारताना त्यांनी समर्थ विरोधाशिवाय लोकशाहीला भवितव्य नाही असे परिस्थितीचे विश्लेषण केले. दिब्रिटो यांनी धर्मासंबंधीही प्रश्नांची उत्तरे दिली. जो सर्वांचा बंधू, तो हिंदू असे सांगत त्यांनी सध्या त्यांना मिळालेल्या अध्यक्षपदावरून टीका करणारेसुद्धा माझे मित्रच आहेत, असे नमूद केले. मे. पु. रेगे यांनी केलेल्या टीकेच्या आधारे आत्मचिंतन करत आहे. मी चुका केल्या आणि मी टीका स्वीकारतो अशी प्रामाणिक कबुली त्यांनी या संवादादरम्यान दिली. श्रद्धेविषयीचे स्वातंत्र्य नाकारू नका, सत्य बहुआयामी असते, वस्तुनिष्ठ सत्याचा पाठपुरावा करावा असेही आवाहन त्यांनी केले. धर्माचा आत्मा शोधा. गाभ्याशी माणूस मिळाला पाहिजे. हेच धर्माचे मर्म आहे, असा पैलू त्यांनी चर्चेदरम्यान मांडला.

शिवसेनेच्या उमेदवाराविरोधात अपक्ष लढणार

म. टा. वृत्तसेवा, पालघर

बोईसर विधानसभा मतदारसंघाची जागा भाजपला सोडली नसल्याने इच्छुक उमेदवार , भाजपचे पालघर जिल्हा सरचिटणीस संतोष जनाठे यांनी बंडखोरी केली असून ते आज, गुरुवारी अपक्ष उमेदवारी नामनिर्देशन पत्र दाखल करणार आहेत.

पालघर तालुक्यातील बोईसर विधानसभा मतदारसंघातील भाजपच्या बंडखोर पदाधिकारी, कार्यकर्त्यांची आणि जनाठे समर्थकांची सभा मनोर येथे हजारो कार्यकर्ते व पदाधिकाऱ्यांच्या उपस्थितीत मारुती मंदिरातील सभागृहात बुधवारी सकाळी झाली. या सभेत जनाठे यांना पक्षाने बोईसर मतदारसंघात निवडणूक लढविण्यासाठी दीड ते दोन वर्षांपासून तयारी करण्यास सांगितली, मात्र ऐनवेळी बोईसर मतदारसंघ शिवसेनेच्या वाट्याला आल्याने जनाठे यांना उमेदवारी मिळाली नाही. त्यामुळे मनोर येथील या सभेत त्यांच्यासह त्याच्या समर्थकांनी बंडखोरी करत निवडणूक लढविण्याचा निर्णय घेतला. जनाठे त्यांचा उमेदवारी अर्ज गुरुवारी सकाळी भरणार आहेत, अशी घोषणा दस्तुरखुद्द जनाठे यांनी पत्रकार परिषदेत केली असून त्याच्या बंडखोरीमुळे भाजप-शिवसेना-आरपीआय महायुतीच्या उमेदवाराला झटका बसणार असल्याचे बोलले जात आहे.

गेल्या दीड ते दोन वर्षांत पोटनिवडणुकीत व आताच्या लोकसभा निवडणुकीत खासदार निवडून आणण्यासाठी रात्रंदिवस काम केले आहे, दोन वेळा गवितांना निवडून आणले तसेच बोईसर विधानसभा क्षेत्रात भाजपची ताकद वाढविण्यासाठी गावपाड्यांत फिरून अनेकांची कामे करून प्रयत्न केले आहेत, असे ते म्हणाले.

बोईसर मतदारसंघातून उमेदवारीसाठी कार्यकर्ते व पदाधिकाऱ्यांच्या संमतीने ते उभे राहण्यासाठी इच्छुक होते. ही जागा भाजपला मिळणार, या आशेने त्यांनी गेल्या अनेक महिन्यांपासून तयारी सुरू केली होती. त्यासाठी सर्व कार्यकर्ते, अधिकारी कामाला लागले होते. महायुतीमध्ये बोईसरची जागा भाजपला न सोडता शिवसेनेला सोडल्याने बुधवारी सकाळी नाराज कार्यकर्ते व पदाधिकारी यांची मनोर येथे सभा घेण्यात आली. त्या मध्ये एकमताने सर्वांनी संतोष जनाठे याना पाठिंबा दर्शविला. त्यामुळे गुरुवारी दहा वाजता अपक्ष उमेदवार म्हणून ते उमेदवारी अर्ज भरून बोईसर विधानसभा लढवणार, अशी भूमिका जनाठे यांनी मांडली.

म. टा. प्रतिनिधी, बीड

गेवराई तालुक्यात सिंदफणा नदीवर धुणे धुण्यासाठी गेलेल्या तिघांचा मृत्यू झाला. ही घटना नांदलगाव (ता. गेवराई) येथे बुधवारी दुपारी घडली. मृतांमध्ये दोन शाळकरी मुलांचा समावेश असून, मुलांना वाचविण्यासाठी गेलेल्या वडिलांचा ही घटनेत मृत्यू झाला.

बुधवारी सकाळी नांदलगांव येथील गाडे कुटुंबातील महिला धुणे-धुण्यासाठी गावा जवळच्या सिंदफणा नदीवर गेल्या होत्या. त्यांच्यासोबत शुभम लक्ष्मण गाडे (वय १२), गोविंद दत्ता गाडे (वय १४) गेले होते. शुभम नदीच्या पात्रात आंघोळ करत असताना बुडत असल्याचे लक्षात येताच, त्याला वाचवायला गोविंद गेला. मात्र दोघेही बुडाले, दोघांना वाचवायला लक्ष्मण भगवान गाडे यांनी नदीच्या पात्रात उडी मारली. परंतु, पाण्याचा अंदाज न आल्याने तिघांचा ही बुडून मृत्यू झाला. घटनेने गावात शोककळा पसरली आहे. तलवाडा येथील आरोग्य केंद्रात तिघांचे शवविच्छेदन करण्यात आले. तलवाडा पोलिसांनी घटनेचा पंचनामा करून अकस्मात मृत्यूची नोंद केली आहे.

- आशा देशमुख, चिंचवड

कैलास मानससरोवर ही यात्रा खडतर मानली जाते आणि ते काही प्रमाणात खरंही आहे. मी आणि माझे पती सुभाष देशमुख यांनी २०१४ साली पुण्यातल्या एका यात्रा कंपनीतर्फे ही यात्रा केली. यात्रा अगदी व्यवस्थित पार पडली. मानस सरोवरचं निळंशार पाणी, त्यात केलेलं स्नान आणि मानसमध्ये दिसणारे राजहंस पक्षी पाहून मन हरखून गेलं. पहाटेची वेळ. एक दैवी प्रकाश मानस सरोवरात दिसतो. असं म्हणतात, की यक्ष, गंधर्व, देवगण स्नानासाठी त्यावेळी मानस सरोवरात येतात. तो दैवी प्रकाश पाहण्यासाठी आम्ही लवकर उठलो. खरं तर, ते दृश्य पाहण्याच्या इच्छेनं झोपच आली नव्हती आणि पहाटे ब्रह्ममुहूर्तावर खरोखरच ते दृश्य पाहून आमच्या आनंदाला पारावार राहिला नाही.

त्यानंतर कैलास पर्वताचं दर्शन आणि कैलास पर्वताची तीन दिवसांची परिक्रमा करून आम्ही परतीच्या प्रवासाला लागलो. परतीचा प्रवासाला सुरुवात करताना बातमी आली, की नेपाळजवळचा कोदारी ते काठमांडू हा रस्ता पुराच्या पाण्यामुळे वाहून गेला आहे. आता आली का पंचाईत! काठमांडूला पोहोचायचं कसं हा यक्षप्रश्न आमच्यापुढे होता. त्या काळजीनं सगळेच यात्रेकरू चिंताग्रस्त झाले, शिवाय परतीच्या विमान प्रवासाचं तिकीटही आधीच काढून ठेवलं होतं. त्यामुळे परतीचं विमान गाठू शकू का? ही काळजीही होतीच. इतर ग्रुपचे यात्रेकरूही हवालदिल झाले होते; पण आमच्या ग्रुपच्या सारथी शिल्पा देशपांडे मात्र खंबीर होत्या. त्यांनी तातडीनं नेपाळहून भारताच्या परराष्ट्र मंत्री सुषमा स्वराज यांना फोन करून सर्व परिस्थितीची कल्पना दिली आणि जादूची कांडी फिरावी तसं सर्व घडलं.

भारताच्या परराष्ट्र मंत्रालयानं नेपाळ सरकारशी संपर्क साधून आमच्या सुटकेसाठी खास हेलिकॉप्टरची व्यवस्था केली. कोदारीच्या त्या लहानशा गावात एका शाळेच्या मैदानात तात्पुरत्या हेलिपॅडची व्यवस्था करण्यात आली होती. त्या मैदानात हेलिकॉप्टर उतरवण्यात आलं आणि तिथून आम्हाला काठमांडू इथं सुखरूप पोहोचण्यात आलं आणि आम्ही सुटकेचा नि:श्वास टाकला. परत आल्यावर यात्रेच्या सुखद आठवणी आणि अचानकपणे घडलेला हेलिकॉप्टरचा प्रवास हा नेहमीच लक्षात राहील.

महापालिकेच्या २० इंजिनीअरची उच्च न्यायालयात याचिका

मंजूर पदांपेक्षा पात्र इंजिनीअरची संख्या मोठी

महापालिका प्रशासनापुढे पदोन्नतीचा पेच

म. टा. वृत्तसेवा, नवी मुंबई

महापालिकेच्या प्रशासन विभागाने नव्याने तयार केलेल्या सेवा नियमावलीतून इंजिनीअरिंग विभागातील सेक्शन इंजिनीअरपद हद्दपार करण्यात आल्याने महापालिकेच्या सेवेत गेल्या १५ वर्षांपासून ज्युनिअर इंजिनीअरपदावर कार्यरत असलेल्या सुमारे २० इंजिनीअरनी डेप्युटी इंजिनीअरपदावर पदोन्नती व वेतनश्रेणीसाठी थेट उच्च न्यायालयात धाव घेतली आहे.

पालिकेच्या इंजिनीअरिंग विभागात सन २००३मध्ये ठोक मानधनावर १४ ज्युनिअर इंजिनीअरची भरती करण्यात आली होती. तसेच, सहा ज्युनिअर इंजिनीअरची नियुक्ती ठोक मानधनावर करण्यात आली आहे. सन २००४मध्ये एकूण २० ज्युनिअर इंजिनीअरांना वेतनश्रेणीनुसार वेतन देण्यात येत होते. सन २००६मध्ये सर्वसाधारण सभेत ठराव क्रमांक ९५६नुसार ठोक मानधनावर काम करणाऱ्या ज्युनिअर इंजिनीअरांना महापालिकेच्या सेवेत कायम करण्याचा निर्णय घेण्यात आला होता. त्यानुसार सर्व साधारण सभेने ज्युनिअर इंजिनीअरांना कायम करण्याच्या निर्णयाची अंमलबजावणी प्रशासनाने करून ५५०० ते ९००० ही वेतनश्रेणी ज्युनिअर इंजिनीअरना लागू करण्यात आली आहे.

ज्युनिअर इंजिनीअर, डेप्युटी इंजिनीअर, ज्युनिअर व एग्झिक्युटिव्ह इंजिनीअरपदावर काम करणाऱ्या इंजिनीअरना किमान तीन वर्षे ते ११ वर्षे दरम्यान पदोन्नती व वेतनश्रेणी देण्याचे बंधनकारक आहे. सन २०१८मध्ये ज्युनिअर इंजिनीअरपद रद्द केल्याने मिलिंद पवार यांच्यासह अन्य पाच ज्युनिअर इंजिनीअरनी डेप्युटी इंजिनीअरपदावर नियुक्ती मिळावी व वेतनश्रेणी लागू करण्यासाठी उच्च न्यायालयात धाव घेतली आहे. त्यानंतर तब्बल एक वर्षानंतर महापालिकेतील १४ ज्युनिअर इंजिनीअरांनीदेखील डेप्युटी इंजिनीअरपदावर पदोन्नती मिळावी, अशी मागणी प्रशासनाकडे केली आहे. यापूर्वी मिलिंद पवार यांच्यासह सहा व आता १४ ज्युनिअर इंजिनीअर मिळून एकूण २० ज्युनिअर इंजिनीअरनी डेप्युटी इंजिनीअरपदावर पदोन्नती देण्याची मागणी प्रशासनाकडे केली असताना इंजिनीअरिंग विभागातील १३ सेक्शन इंजिनीअरनी डेप्युटी इंजिनीअरपदावर पदोन्नतीची मागणी प्रशासनाकडे केली आहे. त्यामुळे एकूण ३३ इंजिनीअरनी डेप्युटी इंजिनीअरपदावर पदोन्नती देण्याची मागणी केल्यामुळे प्रशासनापुढे पेच निर्माण झाला आहे.

महापालिकेत डेप्युटी इंजिनीअर पदनिर्मितीची संख्या कमी असताना त्यात पदोन्नतीसाठी पात्र इंजिनीअरची संख्या जास्त असल्याने नुकतेच न्यायालयात गेलेल्या १४ ज्युनिअर इंजिनीअरनी प्रशासनाला डेप्युटी इंजिनीअरपदावर पदोन्नती देणे शक्य नसल्यास ज्युनिअर इंजिनीअरना डेप्युटी इंजिनीअरपदाची जबाबदारी व वेतनश्रेणी द्यावी, असा पर्याय प्रशासनापुढे ठेवला आहे.

शासनमंजुरीशिवाय पदोन्नती अशक्य

ज्युनिअर इंजिनीअरची वेतनश्रेणी ५५०० ते ९००० असल्याने त्यांना थेट डेप्युटी इंजिनीअरपदाची वेतनश्रेणी १५००० ते ३९००० (ग्रेड ५४००) वेतनश्रेणी महापालिका प्रशासनाला लागू करावी लागणार आहे. ज्युनिअर इंजिनीअरनी केलेल्या मागणीनुसार डेप्युटी इंजिनीअरपदाची वेतनश्रेणी लागू करण्याबाबत प्रशासन सकारात्मक आहे. परंतु सेवानियमानुसार आलेल्या सूचना व हरकतींचा विचार करून लवकर सेवा नियम राज्य सरकारकडे मंजुरीसाठी पाठविण्यात येतील. सध्या सेवा नियमांना शासन मंजुरी नसल्याने ज्युनिअर इंजिनीअरना उच्च पदाची वेतनश्रेणी देता येणार नाही. डेप्युटी इंजिनीअर हे पद वर्ग-१चे असल्याने शासनाच्या निर्णयानुसार याबाबत विचार करण्यात येईल, असे प्रशासन विभागाचे उपायुक्त किरणराज यादव यांनी सांगितले.

ठाणे : ठाण्यातील नवोदया इंग्लिश हायस्कूलचा ५०वा वर्धापन दिन साजरा करण्यात आला. यावेळी शाळेच्या आजी-माजी विद्यार्थ्यांसह शिक्षक, मुख्याध्यापकांनाही एकत्र येत या शैक्षणिक उत्सवात सहभाग घेतला.

शाळेला ५० वर्षे पूर्ण होत असल्याने सुवर्णमहोत्सवी वर्षाचे आयोजन करण्यात आले होते. यावेळी शाळेचे अध्यक्ष जया शेट्टी, चिटणीस दयानंद शेट्टी, खजिनदार सुनील शेट्टी तसेच प्राथमिक, माध्यमिक विभागाचे प्राचार्य यांनी हजेरी लावली होती. शाळेत प्राथमिक, माध्यमिक तसेच ज्युनिअर कॉलेज अशा तिन्ही विभागांचे काम चालते. शंभर टक्के निकालाची परंपरा कायम राखतानाच शैक्षणिक प्रगतीसह कला, क्रीडा या क्षेत्रांमध्येही विद्यार्थ्यांची कामगिरी असावी, यासाठी विविध स्पर्धांचे आयोजन केले जाते. शाळेच्या शैक्षणिक कारकि‍र्दीस पन्नास वर्षे पूर्ण झाल्यानिमित्त कार्यक्रम सादर झाला. त्यामध्ये शिक्षकवृंद तसेच मुख्याध्यापिका यांचा सन्मान केला गेला. यावेळी स्नेहभोजनासह विविध सांस्कृतिक कार्यक्रमांचेही आयोजन करण्यात आले होते.

अंबरनाथ, उल्हासनगर शहरात नागरिक हैराण

म. टा. वृत्तसेवा, अंबरनाथ

यंदाच्या मोसमात जोरदार हजेरी लावणाऱ्या पावसाने काही दिवसांपूर्वी विश्रांती घेतली, मात्र पावसामुळे रस्त्यांची चाळण झाली आहे. विधानसभा निवडणुकीच्या आचारसंहितेपूर्वी रस्तेदुरुस्तीचे तातडीचे आदेश आले असले, तरी अद्याप रस्ते दुरुस्तीचे काम न झाल्याने शहरात धुळीचे साम्राज्य पसरले आहे. त्यामुळे दुचाकीस्वार, पादचारी आणि रस्त्या शेजारच्या नागरिकांत संतापाचे वातावरण आहे. त्यामुळे तातडीने रस्ते दुरुस्तीची कामे करावीत, अशी मागणी आता होत आहे.

दोन दशकांमध्ये सर्वाधिक पाऊस यंदाच्या वर्षात झाला. जून महिन्यात दडी मारणाऱ्या पावसाने महिनाअखेर जोरदार आगमन केले. जुलै आणि ऑगस्टमध्ये उल्हासनगर, अंबरनाथ आणि बदलापूर शहरांना पुराचा तडाखा बसला. त्यामुळे त्याचा परिणाम शहरातील सार्वजनिक व्यवस्थेवर झाला. संततधार पावसामुळे उल्हासनगर शहरात मोठ्या प्रमाणावर खड्डे पडले. अंबरनाथ शहरातही कल्याण बदलापूर रस्ता, फॉरेस्ट नाका ते टी-पॉइंट रस्ता, चिखलोली, मोरीवली या भागातील अंतर्गत रस्ते, उड्डाणपूल अशा भागात मोठ्या प्रमाणावर खड्डे होते. बदलापूर शहरातील काही डांबरी रस्ते खड्ड्यांत गेले होते. याबाबत रोष वाढत असतानाच जिल्हा प्रशासनाने तातडीने बैठक घेत रस्तेदुरुस्तीचे काम वेळेत पूर्ण करण्याचे आदेश दिले. गेल्या आठवड्यात पावसाने विश्रांती घेतली खरी, मात्र रस्तेदुरुस्ती आणि डागडुजीचे काम अजूनही सुरू होऊ शकलेले नाही. त्यात तापमान दिवसेंदिवस वाढत असून वाहनांच्या वर्दळीमुळे महत्त्वाच्या रस्त्यांवर मोठ्या प्रमाणावर धूळ उडते. त्यामुळे रस्त्यांवर मोठ्या प्रमाणावर धुळीचे साम्राज्य पसरले आहे.

शहरातील महत्त्वाचे रस्ते आणि अंतर्गत रस्ते सध्या वाहनचालकांसाठी आणि पादचाऱ्यांसाठी डोकेदुखी ठरत आहेत. सातत्याने धूळ उडत असल्याने दुचाकीस्वारांना प्रवास करणे कठीण झाले आहे. तर पादचाऱ्यांनाही त्याचा मोठा त्रास सहन करावा लागतो. रस्त्याच्या शेजारी असलेले दुकानदार आणि रहिवाशांनाही धुळीचा त्रास होतो. या धुळीमुळे श्वसनाचे आजार वाढू लागले आहेत. त्यामुळे रस्त्यांची रखडलेली दुरुस्ती वेळेत पूर्ण करावी, अशी मागणी सर्वसामान्य वाहनचालक आणि नागरिक करत आहेत.

रोगराईत वाढ

सध्या अंबरनाथ, बदलापूर आणि उल्हासनगर शहरात डेंग्यूच्या डासांचे प्रमाण वाढले आहे. त्यामुळे नागरिकांमध्ये भीतीचे वातावरण आहे. त्यात महत्त्वाच्या रस्त्यांवर धुळीचे साम्राज्य वाढत असल्याने नागरिक आणखी त्रस्त झाले आहेत. धुळीमुळे श्वसनाचे आजारही बळावत आहेत.